長大成人最恐怖的地方　鄭丹瑞：變成曾經自己最睇唔起的那種人

「長大成人呢件事最恐怖的地方，是你會變成自己曾經最睇唔起的那種人。」損友吹水大會上，好事之徒講出了一眾損友的心聲。

一入行跟一個team head，絕對係那種見高拜、見低踩，有功自己領，有鑊別人孭的人；我真係打從心底鄙視佢。今日，我見到跟自己工作的後生仔望住我的眼神，就係幾十年前我望住呢個team head的眼神，充滿鄙視、嘲笑、睇唔起。

初時，我總覺得係他們的偏見，是這班後生仔唔識世界、唔知道世界艱難，但係漸漸我發覺自己真係愈來愈似一個我當年最睇唔起的人，未發覺之前，還感覺良好，發覺之後，就好痛苦。

 

而我竟然跟這個當年我最睇唔起的人做了朋友，還合作做生意，到底係我改變了他？抑或是他改變了我？我已經唔識答你。

我嘗試幫他找藉口：佢都唔係咁差啫！我又嘗試幫自己找藉口去自圓其說，點解我會跟他做朋友？做拍檔？他一定有他的好處；但係，一切藉口，在一班年輕人望我的眼神中，都灰飛湮滅，令我無地自容。

聽好事之徒的懺悔，心中一直在回帶，到底我有沒有如好事之徒所言，在歲月流逝之間，無聲無息地，已經變成一個自己曾經最看不起的人？有！一個因為我接受不了他的卑劣行為而跟他割席的朋友。如今，每天照鏡，他都出現在鏡中。